Mui bones a to@s! Un añu más tamos encantaos de poder dar anuncia de la celebración de les Xornaes de Música Tradicional de Nava, cuya segunda edición allugaráse los díes 3, 4 y 5 d’ochobre de 2014.
Esti añu se presenta con munches novedaes y actividaes diferentes que diremos publicando pocu a pocu nes próximes feches.
Dientro de la estaya pedagóxica de les Xornaes atoparemos una mesa redonda, charles didáutiques, masterclass y presentaciones de llibros.
L’apartáu musical tamién sedrá de luxu, tanto poles bandes de gaites participantes nel II Festival de Bandes de Gaites “LaKadarma” como polos grupos que tocaran na Nueche Folk, toes agrupaciones renomaes a nivel internacional.
Los díes 4 y 5 cellebraráse el II Alcuentru de Luthiers d’Instrumentos Tradicionales “Villa de la Sidra”, eventu que l’añu pasáu axuntó a dalgunos de los meyores artesanos d’Asturies, Cantabria, Galicia o Euskadi.
Pa finar, la sesión vermú del día 5 sedrá’l momentu escoyíu pal “II Concursu LaKadarmada”, onde les ganes de folixa y la diversión tan aseguraes y que supunxo un éxitu de participación na so primer edición.
Dende estes llinies queremos dar gracies al Conceyu de Nava por mantener el so compromisu pa cola música y la cultura tradicional al traviés d’estes Xornaes, asina como a tolos axentes y colectivos implicaos que faen que toes estes actividaes seyan posibles: Escuela Municipal de Música de Nava, Casa de Cultura “Marta Portal”, Banda de Gaites “LaKadarma” y HostelNava – Hosteleros de Nava. Gracies fonderes a to@s.
Lo dicho, dentro de mui pocu vos apurriremos muncha más información, pa de momentu marca-y la fecha nel calendariu!!
Saludos!
III Xornaes de Música Tradicional de Nava 