Les Xornaes de Música Tradicional sólo son posibles gracies al trabayu y l’andecha d’una montonera de xente de mui diferentes ámbitos: Ayuntamientu, Escuela de Música, Casa de Cultura Marta Portal, LaKadarma, artistes navetos y cómo non, los hosteleros y comerciantes de Nava.
Dende equí queremos dar gracies a los socios de HostelNava – Hosteleros de Nava pola so total disposición y collaboración con toles inciatives que s’entamen nel pueblu a lo llargo del añu. Y cómo non, les Xornaes de Música Tradicional nun son una excepción.
Al igual que l’añu pasáu, la organización apurrirá a los músicos participantes nesta tercera edición una pulsera acreditativa pa tener promociones y descuentos especiales nos establecimientos que siguen:
Esti añu les Xornaes de Música Tradicional faense coincidir en Nava coles fiestes de San Xuan, una cita que, dende décades, supón un alcuentru coles tradiciones milenaries que n’Asturies y, como nun podía ser d’otra xera, en Nava alquieren un significáu especial venceyaes a la máxica foguera de San Xuan.
Esti añu, pa cellebrar esti solsticiu de branu, nel día’n que se quemen malos augurios, pensamientos y’n que los más gallos amanecen ceo pa dir na busca la flor del agua, contamos con un cartel de auténticu luxu en Nava.
A partir de les 22:30 hores del martes 23 de xunu, acabao el III Festival de Bandes de Gaites LaKadarma, la cita sedrá na Plaza Manuel Uría colos grupos MACLEOD!, d’Escocia y Llan de Cubel, grupu decanu de la música folk asturiana, con 30 años de trayectoria n’escenarios de tol mundu. Hai que dicir qu’esti conciertu sedrá mui especial ya que va ser una de les poques ocasiones que tendremos de ver n’Asturies a Llan de Cubel esti añu, y fadránlo acompañaos de diferentes músicos collaboradores nuna nueche que, de xuru, quedará pal recuerdu de tolos amantes de la bona música asturiana.
MACLEOD! ye’l nuevo grupu escocés compuestu por Iain MacLeod (mandolina, voz), Ewen Henderson (vigulín, gaita, voz) y Mike Bryan (guitarra, voz).
IAIN MACLEOD lleva na primera llínia de la música escocesa dende fai casi 30 años col grupu MIRO, y colos emblemáticos pioneros de la música acid-folk, SHOOGLENIFTY. Un de los meyores mandolinistes d’Escocia, ye tamién reconocíu como compositor. El so estilu enérxicu y llíricu tienlo llevao a actuar n’escenarios per tol mundu.
EWEN HENDERSON rescampla como ún de los meyores músicos mozos d’Escocia. Ñació nel senu de la perconocía familia Henderson de Lochaber nes tierres altes del oeste d’Escocia y vivió dientro de la cultura tradicional y Gaélica dende mui neñu. Un cantante excelente n’esta última llingua, mayestru del vigulín y de la gaita, foi ya con tan solo 27 años, miembru de los destacaos grupos escoceses Manran y The Battlefield Band.
MIKE BRYAN ta al frente de les nuevas corrientes musicales surdíes d’entre la mocedá escocesa. Miembru fundador del grupu de música fusión, «The Treacherous Orchestra», tien collaborao con un gran elencu d’artistes escoceses. Un gran acompañante, discípulu de Neil Young y Nirvana (y tamién de Llan de Cubel!), Mike ufre lluz y enerxía onde quiera que vaya.
Nueva música con mucha fuerza dende Escocia… MACLEOD!
Esti proyeutu ye de tan nueva creación qu’entá nun hai material disponible pa poder sentilos, poro, traémosvos un videu de Iain MacLeod tocando col grandísimu vigulineru escocés Simon Bradley, del grupu Llan de Cubel.
Vamos agora con un grupu que, pa munchos de vosotros, casi nun necesita presentación: Llan de Cubel.
Llan de Cubel ye un grupu asturianu de música folk, que trabaya sola tradición músical d’esti país, dándo-y un soníu nueu.
Pa ello recurre principalmente al material recoyío nos archivos de los grupos asturianos d’investigación etnográfica y a los cancioneros tradicionales; esto compleméntase cola recuperación polos miembros del grupu de temes tradicionales direutamente de la xente asturiano, ensin escaecer los temes más populares del país.
La formación de los componentes del grupu básase en dos aspeutos fundamentales: per un llau, son músicos tradicionales, conocedores ya intérpretes habituales de los istrumentos más carauterísticos d’Asturies; per otru llau, el so interés por otres tradiciones de la Europa Atlántica enriqueciera los conocimientos musicales del grupu, especialmente nos aspeutos téunicos y armónicos.
El soníu de Llan de Cubel ye acústicu. El pesu la melodía y la percusión llévenlo los istrumentos tradicionales asturianos (gaita, vigulín, flauta travesera de maera, tambor y panderos), mentes que la armonía apúrrenla la guitarra acústica y el bouzouki (que tamién contribuyen a la sólida base rítmica, tan carauterística del grupu). Namái se recurre a istrumentos elléutricos (pedalera de baxos y teclaos) como sofitu en pasaxes muy concretos de dellos temes. Anque la llínia ye básicamente istrumental, el grupu tamién trabaya l’aspeutu vocal aprovechando la llarga y rica tradición nesta fastera de la música tradicional astur.
El repertoriu del grupu provien, en gran midía, de la tradición asturiana de vigulín, flauta, acurdión y, sobre too, de gaita: alboraes, marches y pasucáis, bailles (como saltones, muñeres, polques, …), música relixosa (misa de gaita, entemeiu misa), etc. Otres fontes habituales incluyen dancies y canción tradicional asturiana: tonada, vaqueiradas, villancicos, cantares (de la marina, de trabayu, de chigre,…). En cuanto a los temes cantaos, ainda incluyendo delles lletres tradicionales, Llan de Cubel suel emplegar testos de autor, normalmente contemporáneos, siempre musicaos con melodíes tradicionales asturianes.
Dende los sos anicios en 1984, Llan de Cubel participó activamente nel procesu revitalización de la cultura tradicional asturiana, contribuyendo igualmente a la divulgación de la mesma, sobre too no que a música y llingua se refier. El so llabor como grupu pioneru del folk asturianu ta reconocío na importante obra Hestoria d’Asturies, nel apartáu dedicao a la hestoria de la música asturiana. Anguañu ye la formación más consolidada dientru’l movimientu folk autóctonu, siendo referencia importante pa les nueves xeneraciones.
Bones!! Seguimos esmigayándovos la programación d’estes III Xornaes y güei falamos de los grupos que tocarán na nueche folk del sábadu, como siempre, na Plaza Manuel Uría a partir de les 22:30 hores.
Esti añu contamos con un cartelu d’auténticu luxu, col grupu llionés Tarna, el gaiteru mierense Borja Baragaño y la bandina tradicional El Koku la Manzana.
Tarna ñaz nel añu 2007 col oxetivu d’ellaborar un repertoriu basáu na música de la tradición llionesa más desconocía pal gran públicu, revitalizando dich repertoriu y dando-y un calter mas contemporáneu. Frutu d’esta iniciativa apaez el so primer trabayu Si esperaran las liebres… (2010), un discu grabáu en directu col qu’algamen perbones crítiques na escena folk nacional, y que espeya a la perfección el so firme compromisu cola tradición. Nel so segundu trabayu, El hombre que tenía una vaca (2014), la naturaleza tímbrica del grupu sufre un profund cambiu y percíbese con claridá una gran madurez nel minuciosu trabayu d’igües y composición. Brittany Hass, Luke Plumb , Xoxé Antón Ambás o Ana Alcaide son dalgunos de los músicos que lo acompañen nesta grabación, asina como’l xenial poeta Juan Carlos Mestre. Ensin dulda alguna, Tarna ye un proyeutu que sorprenderá a propios y extraños pola so contundencia en directu, lo cuidao de les sos igües y lo completo de la so propuesta musical.
COMPONENTES
Diego Gutiérrez: voz, guitarra acústica y harmónica
Rodrigo Martínez: whistles, gaita, bouzouki y voz
Borja Baragaño, ye un gaiteru y flautista mierense, Asturies, afincá n’Ibbenbüren, Alemaña.
Entama cola gaita asturiana a la edá de 9 años. Nos sos primeros años como gaiteru forma parte de bandes de gaites como BG Villaviciosa y BG Mieres del Camín, nesta última siendo director los últimos 15 años.
A la edá de 16 años interésase pola flauta y la uilleann pipe (gaita irlandesa).
Enantes d’emigrar a Alemaña, impartía clases de gaita, flauta y uilleann pipe na BG Mieres del Camín, na Escuela de Música Tradicional La Quintana de Xixón y nel Conservatoriu de Morea d’Ayer, dientro del Aula de música tradicional.
A partir del añu 2000 entama a formar parte del grupu folk Llangres, formación cola que gana varios concursos a nivel nacional y cola que graba tres Cds, amás de facer conciertos n’Asturies, España, Italia, Francia, Bretaña, Inglaterra, entre otros países.
Nel año 2007 incorpórase al grupu DRD, grabando’l discu DRD al añu siguiente y tamién representando la música y cultura asturiana tanto dientro como fuera d’Asturies .
Collaboró en grupos como La Bandina’l Tombo, N’arba o Felpeyu entre otros y participó nuna montonera de grabaciones d’artistes y agrupaciones como Mariluz Cristobal Caunedo, la OSPA, Esther Fonseca, Orquesta de Cámara Valle del Nalón, Pandereteres de Fitoria, etc.
N’ochobre de 2014 edita con Tierra Discos el so primer CD en solitariu, Onde yo me pueda dir, acompañáu de músicos y amigos colos que lleva coincidiendo’n grupos o grabaciones a lo llargo de los últimos 15 años.
Anguaño, Borja Baragaño ta tocando en dúu con Rubén Bada y tamién en formación de quintetu pa defender nos escenarios el s album de debut.
N’Alemaña forma parte de la bayurosa escena folk qu’esiste nel país tanto impartiendo cursos de gaita y flauta como faciendo conciertos y talleres referentes a la cultura y música asturiana.
COMPONENTES
Rubén Bada: bouzouki
Dolfu R. Fernández: vigulín, voz
Luís Senén Fernández: baxu, voz
Juanjo Díaz: percusiones
Viriu Fernández: técnicu soníu, bodhrán y bouzouki
Borja Baragaño: Flauta de maera, gaita asturiana y uilleann pipes
El Koku la Manzana ñaz en Xixón na década de los 90, de la xuntanza d’un grupu músicos tradicionales que comparten la so afición pola recuperación de la música asturiana. Estos músicos, mayestros en distintes escueles de música tradicional, entaílen una llarga trayectoria con una bayura bandes y grupos, y cuenten nel so haber con abondes distinciones en nomaos concursos, como’l Ciudá d’Uviéu, Concursu de pareyes de Xixón, Troféu Remis Ovalle, entre otros. Con una formación instrumental constituyía principalmente por gaites, tambor, bombu y curdión diatónicu, basen el so repertoriu en sones populares, tradicionales y modernos, ya inclusu amiesten melodíes foriates y ayenes a la tradición. Acostumaos al espectáculo de cai y escenariu, con igües cencielles y folixeres, xustifiquen el so cálter gayoleru y platiqueru col qu’esti grupu, al puru estilu tradicional de la “vieya escuela”, desendolca una llabor señalao d’espardimientu de los ritmos qu’antañu se tocaben pelos pueblos asturianos.
El sábadu pela tarde, tendrán llugar parte de les actividaes d’estes Xornaes de Música Tradicional. A les 17:00 hores na Plaza Manuel Uría podremos disfrutar d’una amuesa de baille asturianu a cargu de los mozos y moces del Grupu Folclóricu La Flor del Pumar.
La Flor del Pumar ye’l nome del grupu folclóricu surdíu nel conceyu de Nava, ante l’ausencia d’ún que velase poles raíces de la tradición naveta. Esta formación ñació venceyada a la prestixosa Escuela Municipal de Música del conceyu, na que s’ufiertaba l’asignatura de baille tradicional.
El Conceyu de Nava facilita-yos les instalaciones del Centru Sociocultural Llagar de Sorribes pa desendolcar los sos ensayos.
A partir de les 18:00 hores na Plaza Pepe el Turráu podremos ver y participar na performance Soplu de vida, una creación desendolcada especialmente pa estes Xornaes a cargu de los artistes navetos Carmen Montes y Maximiliano Francisco G. que contará cola collaboración de músicos del conceyu. Esta ye la segunda participación d’estos grandísimos artistes nes Xornaes de Música Tradicional, y dende la organización queremos agradeceyos el so entusiasmu, disposición y collaboración pa toles idees que se-yos ufren.
Pal que nun lo sepa, Carmen Montes, ceramista que manexa los fornos del Taller El Migayu, ye la creadora de los pieces exclusives que la Banda de Gaites LaKadarma ufre a les bandes convidaes al so Festival, y esti añu Maxi ye l’encargáu del diseñu de la cartelería de les Xornaes. Dende equí namás podemos decivos una cosa: ¡¡GRACIES!!
Bones! Güei pasamos a falavos de les bandes que participarán nel Festival de Bandes de Gaites LaKadarma.
Esti añu les bandes participantes son tres: BG Noega (Xixón), BG Castrillón(Castrillón) y BG El Gumial(Ayer), amás de la BG LaKadarma, qu’actuará como anfitriona nesti espectáculu qu’algama asina la so tercer edición.
El desfiles de les bandes saldrá a les 19:00 hores dende diferentes puntos de la villa naveta pa darréu d’ello, ufrir un conciertu de les bandes na Plaza Manuel Uría.
La Banda de Gaites Noega fúndase nel añu 1991 baxo la dirección d’Alberto Fernandez Varillas. Nel añu 2005 garra la dirección Pablo Rodriguez Alonso, miembro fundaor de la banda, mayestru gaiteru y musicu tituláu en pianu y flauta barroca. Anguaño, el mayestru Arsenio González Ruíz faise cargu de la sección de percusión, siguiendo col trabayu realizáu durante años por Manuel Cordero.
Dende los sos anicios, Noega caracterízase por un soníu tradicional, respetuosu cola cultura asturiana; pa ello emplega gaites en do, d’una alta estabilidá musical que permite un altu control de l‘afinación, entre si y con otros instrumentos y agrupaciones orquestales, faceta pola que la banda ye pervalorada. Demientres años llevo’l so espectáculu por estremaos llugares d’Asturies, representándola amas nuna bona riestra de fiestes y festivales per tola xeografia nacional e internacional.
La Banda de Gaites Castrillón fae la so presentación oficial en Xineru del añu 2.002 col patrociniu de la Fundación Municipal de Cultura del Conceyu de Castrillón.
Componse n’actualidá d’alrodiu de 30 músicos dirixíos por Velu Muñiz y por David González nel apartáu de percusión.
Na so curtia hestoria pueden reseñase actuaciones en bayura d’eventos (festivales de bandes, concursos, folixes) per tola xeografía asturiana asina como per estremaos llugares del estáu español (Galiza, Andalucía, Castiella-Llión, Llevante, La Rioxa) y tamién en Francia.
Los traxes qu’emplega son los tradicionales de la zona central d’Asturies y los instrumentos, anguaño, son gaites de granadillu afinaes en Si bemol, con roncón y ronquín; la percusión compónse de caxes d’alta tensión, tenores y bombu.
La Banda ye’l pegoyu fundamental de l’Asociación Cultural L´Alborcer, creada cola intención d’impulsar la cultura tradicional asturiana nel conceyu de Castrillón. L’oxetivu de l’Asociación ye fomentar al so rodiu too tipu d’espresiones relatives a la cultura y música asturianes: baille, curdión, percusión y pa ello dispón d’una escuela de música tradicional propia onde se ponen clases pa los escolinos que nel futuru formarán parte de la banda.
El so repertoriu componse básicamente de música tradicional asturiana: xotes, muñeires, pasucáis y cantares, entre otres pieces, sumando-y tamién dalguna melodía d’otres naciones del arcu atlánticu.
La Banda de Gaites El Gumial surde nel conceyu d’Ayer a entamos del 2012 por mor de les ganes d’un grupu de xente de facer una banda en condiciones pal conceyu. Asina, xuntóse xente d’edaes comprendíes entre los 14 y los 40 años, procedentes d’otres agrupaciones o simplemente novatos nesto, pero lo mas fundamental, con ganes d’entamar una de les meyores bandes de gaites. Ensayen nes Antigües Escueles de Caborana tolos domingos dende les 16:00 h. n’adelantre y los vienres de 18:00 a 20:00 h.
Anguaño la banda usa gaites asturianes en si bemol (punteros de Miguel Alonso), caxes d´alta tensión Premier HTS 700 y timbales y bombo Premier Hosbilt. Tol que quiera tocar la gaita, el tambor, el timbal, la caxa d’alta tensión o’l bombu, facer dalgo bono nel conceyu y sobre too, pasalo bien, puede pasase pol llocal d’ensayu. La banda ta actualmente dirixía nel apartáu de gaita por Diego Lobo y la percusión ta a cargu de Manuel Durán.
Nun vos lo penséis más, ¡veni-y a disfrutar de lo meyor de la gaita a Nava!!
Les meses redondes son técniques de trabayu perinteresantes de cara a determinar l’estáu de la cuestión en temes d’interés, nesti casu, no que cinca a la música tradicional. Nelles participen persones destacaes del campu correspondiente aportando les sos visiones particulares pa fomentar la discusión y’l debate, tanto entre les persones de la mesa como entre’l públicu asistente.
La mesa d’esti añu llevará por títulu L‘Asturianada: pasáu, presente y futuru. Tres de la reconocencia en mayu de 2015 por parte del Conseyu de Gobiernu del Principáu d’Asturies de la Asturianada como Bien d’Interés Cultural de Calter Inmaterial, plantegamos esta mesa redonda col enfotu d’afondar nel conocimientu d’esti xéneru vocal ancestral asturianu. Fadremos un percorríu pela hestoria de la tonada, intérpretes clásicos, grabaciones; falaremos del papel de la muyer dientro de l’asturianada, revisaremos la situación del xéneru anguaño (númberu d’intérpretes, asociaciones, concursos) asina como propuestes de sistematización y notación musical pa la ellaboración de materiales pal so deprendimientu y estudiu.
PARTICIPANTES:
Fernando Entrialgo Vega. Intérprete d’asturianada. Investigador sobre la discografía antigua d’esti xéneru.
Mui bones a to@s!! Un añu más tamos percontentos de poder anunciavos la cellebración de les Xornaes de Música Tradicional de Nava, qu’algamen yá la so tercer edición los díes19, 20 y 23 de xunu.
Les Xornaes entamarán como yá ye vezu la tarde del vienres 19 a les 18:00h. col actu de presentación oficial y la mesa redonda L‘asturianada: pasáu, presente y futuru,que reunirá pa fablar sobre esti tema a diferentes investigadores y intérpretes d’esti xéneru vocal asturianu.
El sábadu 20 a les 17:00h. allugaráse na Plaza Manuel Uría una muestra de baille asturianu a cargu del grupu navetu La Flor del Pumar.
A les 18:00 na Plaza Pepe El Turráu podremos ver y participar na Performance Soplu de vida, creación de los artistes navetos Carmen Montes y Maximiliano Francisco G.
Esa mesma nueche a partir de las 22:30h, darréu de finar el tradicional Mercáu Astur de San Xuan, tendrá lugar la Nueche Folk colos grupos Tarna (Llión), el gaiteru Borja Baragaño (Asturies), presentando’l so discu en solitariu «Onde yo me pueda dir», y la bandina tradicional El Koku la Manzana (Asturies).
El martes 23, coincidiendo con la festividá de San Xuan, cellebraráse a les 19:00h. el III Festival de Bandes de Gaites LaKadarma cola BGNoega (Xixón), la BG L’Alborecer (Castrillón) y la BGEl Gumial (Ayer) amás de LaKadarma como banda anfitriona. A partir de les 22:30, podremos disfrutar de los conciertos de los grupos MacLeod! (Escocia) y Llan de Cubel (Asturies), grupu decanu del folk asturianu, nun conciertu especial con músicos convidaos y munches sorpreses.
Nos próximos díes espublizaremos el cartelu, que ta na fase final del so diseñu y diremos como siempre dándovos información de tolos participantes nestes III Xornaes… ¡¡Yá nun queda na!! ¡¡Esperámosvos en Nava!!
Les Xornaes de Música Tradicional sólo son posibles gracies al trabayu y l’andecha d’una montonera de xente de mui diferentes ámbitos: Ayuntamientu, Escuela de Música, Casa de Cultura, LaKadarma, artistes navetos y cómo non, los hosteleros y comerciantes de Nava.
Dende equí queremos dar gracies a los socios de HostelNava – Hosteleros de Nava pola so total disposición y collaboración con toles inciatives que s’entamen nel pueblu a lo llargo del añu. Y cómo non, les Xornaes de Música Tradicional nun son una excepción.
Al igual que l’añu pasáu, la organización apurrirá a los músicos participantes nesta segunda edición una pulsera acreditativa pa tener promociones y descuentos especiales nos establecimientos que siguen:
– Sidrería La Barraca: cerveza a 1’50€; sidra a 2€; por cada comensal (comides o cenes, carta para picar) obsequiu d’una botella de sidra de pera «Angelón» (33 cl.) y ‘l café gratis.
-Sidrería Prida: menú fin de selmana/menú «Berrera» a 12€.
-Sidrería Casa Mino: Menú «Berrea» a 13€; café 1€.
– Bar El Florida: caña 33cl., Cerveces Mahou Classic o Carling y café a 1€.
-Bar La Naveta: Cerveza Estrella y refrescos a 1’50€; cerveza Caleya a 2€
– Bar La Posta: cerveza Mahou a 1’50€; café a 1€.
– Sidrería La Figar: menú fin de selmana a 12€.
– Sidrería Plaza: Menú especial «Berrea» a 14€; menú fin de selmana a 12€; café a 1€
– Sidrería-Restaurante Casa Angelón: 10% de descuentu en toles consumiciones (bebides y carta).
– Café-Bar Milenium: Pinchu (tamañu grande) a 1€; café a 1€; cervezes Mahou y Estrella a 1’70€
– Cafetería CaNel: Café a 1€; pinchu a 1€; refrescos y cerveces a 1’5€
Ta-y atentos a esti blog, porque entre’l xueves y’l vienres vamos completar la llista con más establecimientos collaboradores.
Esta ye la pulsera que la organización va facilitar a los participantes (músicos, luthiers y artistes) nes II Xornaes de Música Tradicional.
III Xornaes de Música Tradicional de Nava 